வெள்ளி இடைநகர்வு 2012 - ஓர் அபூர்வ வான் நிகழ்வு

தமிழ்நாடு அறிவியல் இயக்கம்

வெள்ளி இடைநகர்வு 2012 - ஓர் அபூர்வ வான் நிகழ்வு

நம்வாழ்வின் கடைசி வாய்ப்பு

நாம் அனைவரும் இவ்வருடம் ஜூன் 6ம் தேதி வெள்ளி இடைநகர்வு எனும் ஓர் அபூர்வ வான்நிகழ்வைக் காண இருக்கிறோம். வெள்ளிக் கோளானது சூரிய தட்டின் வழியே ஒரு புள்ளி போன்று நகர்ந்து செல்வதையே வெள்ளி இடைநகர்தல் (Transit of Venus) என்கிறோம்.

            2004ம் ஆண்டு ‘வெள்ளி இடைநகர்வு” உலகம் முழுவதிலும் பொதுமக்கள் பலரால் பார்கப்பட்டது. 121 வருடங்கள் கழித்து நடந்த இந்நிகழ்வை தமிழ்நாடு முழுவதும் தமிழ்நாடு அறிவியல் இயக்கம் ஆயிரக்கணக்கான மாணவர்களையும் மக்களையும் காணச்செய்தது. இதன்பிறகு டிசம்பர் 2117ல்தான் நிகழும். எனவே தற்போதுள்ள தலைமுறையினர் யாரும் ஜூன் 6 நிகழ்விற்குப்பின் இதைக் காணமுடியாது. எனவேதான் இது ஓர் அரிய நிகழ்வாகிறது..

இந்நிகழ்வில் அப்படியென்ன முக்கியத்துவம் உள்ளது என்ற கேள்வி பலருக்கு எழலாம்.. இந்நிகழ்வின் மூலமே நமக்கும் சூரியனுக்கும் உள்ள தொலைவு எவ்வளவு என கணக்கிடப்பட்டது.

எப்போது காணலாம்?

                        இந்த நிகழ்வு ஐந்துகட்டங்களாக நடைபெறுகின்றது.

1.     வெள்ளி  நுழையும்முன் சூரியதட்டினை வெளிப்புறமாக தொடுதல்

2.     வெள்ளி முழுவதுமாக சூரியதட்டினுள் சென்றுவிடுதல்

3.     வெள்ளி நகர்வின் மையப்பகுதி

4.     வெள்ளி வெளியேறும் முன் சூரியதட்டின் உட்புறத்தைத் தொடுதல்

5.     முழுவதுமாக வெளியேறிவிடுதல்.

சென்னையில் இந்த ஐந்து கட்டங்கள் தெரியும் நேரங்களைக் கீழே காணவும்.

தமிழ்நாட்டின் தெற்கே செல்லச் செல்ல அதிகபட்சமாக 15 வினடிகள் வரை இந்நேரங்கள் தாமதமாகலாம். முதல் இரண்டுநிகழ்வுகளும் தமிழ்நாட்டில் சூரியோதயத்திற்குமுன் நடப்பதால் நம்மால் காண இயலாது. சூரியன் உதித்ததிலிருந்து (காலை 5.41 மணி முதல்) கடைசி  நிகழ்வுவரை நம்மால் காண இயலும்.

வெள்ளி இடைநகர்வு தெரிந்த / தெரியும்  வருடங்கள்

ஜுன்		1761 1769		2004 2012		2247 2255
டிசம்பர்	1631 1639		1874 1882		2117 2125

இந்நிகழ்வை எவ்வாறு காண்பது?

இந்நிகழ்வினைப் பார்க்க பின்வரும் முறைகளைப் பின்பற்றலாம்.

1.     சூரியகண்ணாடிகள் அல்லது வெல்டிங்கிலாஸ் மூலம் தொடர்து பார்க்காமல் சில வினாடிகள் மட்டும் பார்த்தல்,,

2.     சிறிய கையடக்கக் கண்ணாடி( எந்த வடிவமானாலும் சரி) மூலம் சூரிய பிம்பத்தை வட்டமாக தெரியுமாறு இருட்டறையின் சுவற்றில் வீழ்த்திப் பார்த்தல், செய்முறையை கீழே காணவும். 

3.     தொலைநோக்கி மூலம் பிம்பத்தை திரையில் வீழ்த்திப் பார்த்தல்.

எச்சரிக்கை! ஒருபோதும் சூரியனை நேரடியாகக் காணாதீர்! ஏனெனில் சூரிய ஒளி மற்றும் வெப்பம் நம் கண்ணிலுள்ள லென்சுகளால் குவிக்கப்பட்டு விழித்திரை நிரந்தமாக பாதிக்கப்படும். எனவே பார்வை வெகுவாகப் பாதிக்கப்படும்.

செய்முறை

தேவையான பொருட்கள்: சிறிய முகம் பார்க்கும் கண்ணாடி, சுமார் 1செ.மீ விட்டம்   துளையிட்ட அட்டை

1.     சிறிய கண்ணாடி (Pocket mirror) மூலம் சூரிய வெளிச்சத்தை இருட்டறையில் புள்ளிகளற்ற சமதளமான வெள்ளை சுவற்றிலோ அல்லது காகிதத்திலோ விழச்செய்யவும்.

2.     கண்ணாடியின் முன்பாக சுமார் ½ மீட்டர் தூரத்தில், துளையிட்ட அட்டையை கண்ணாடிக்கு செங்குத்தாக பிடிக்கவும்.அல்லது அதை இடைவெளி இல்லாது கண்ணாடியில் ஒட்டிவிடவும்.

3.     இப்போது சூரியனின் பிம்பத்தை இருட்டறையில் காணலாம். மேலும் அதில் சூரியபுள்ளிகளையும், வெள்ளி கோள் கடந்து செல்வதையும் காணலாம்.

4.     சூரிய பிம்பத்தின் விட்டம் 12-15 செ.மீ இருப்பதால் கரும்புள்ளியாகத் தெரியும் வெள்ளியின் விட்டம் 3.5 – 4.5 மி.மீ இருக்கும்.

குறிப்பு:

1.     15 செ.மீ விட்டம் உள்ள பிம்பம் தெரிய வேண்டுமானால் 15மீ (50 அடி) தூரத்திலிருந்து கண்ணாடி மூலம் சூரிய ஒளியை பிரதிபலிக்கச் செய்யவேண்டும். அதாவது X செ.மீ விட்டம் உள்ள பிம்பம் வேண்டுமெனில் X தூரத்திலிருந்து கண்ணாடியை பிரதிபலிக்கச் செய்ய வேண்டும்.

2.     விட்டம் பெரியதாக ஆக, பிம்பத்தின் வெளிச்சம் குறைந்து கொண்டே வரும்.

3.     பிம்பத்தினை ஒரு வரைபடத்தாளில் (graph Sheet) விழச்செய்து, சூரியன் மற்றும் வெள்ளியின் பிம்பங்களை ஒரே நேரத்தில் வரைந்தால், வெள்ளியைவிட சூரியனின் பிம்பம் எத்தனை மடங்கு பெரியதாக இருக்கிறது எனக் கணக்கிடலாம்.

பாதுகாப்பான முறையில் இந்த அரியநிகழ்வை தாங்கள் ஜூன் 6 அன்று காண தமிழ்நாடு அறிவியல் இயக்கத்தின் வாழ்த்துக்கள்!

வெள்ளி இடைநகர்வு 2012, ஜூன் 6.

புதுக்கோட்டை: ""வரும் ஜூன் ஆறாம் தேதி வானில் நடக்கும் வெள்ளி இடைநகர்தலை வெறும்கண்ணால் பார்ப்பது ஆபத்து,'' என்று கல்பாக்கம் அணுமின் நிலைய விஞ்ஞானி எச்சரித்துள்ளார்.

வானில் அபூர்வமாக நடக்கும் நிகழ்வுகளில் வெள்ளி கோளானது சூரியனுக்கும், பூமிக்கும் நடுவே நகர்ந்து செல்லும், வெ ள்ளி இடைநகர்தல் ஆகும். கடந் த 400 ஆண்டுகளில் வெள்ளி இடைநகர்தல் நிகழ்வு 53 முறை நடந்துள்ளது. கடைசியாக கடந்த 2004ம் ஆண்டு வெள்ளி இடைநகர்தல் நிகழ்வு நடந்தது.
இப்படிப்பட்ட அபூர்வ நிகழ்வானது, அடுத்த முறை 105 ஆண்டுக்கு பின் தான் ஏற்படவுள்ளது. ஆகையால், தற்போதுள்ள தலைமுறையினர் யாரும் அடுத்தமு றை பார்க்க முடியாத அபூர்வமா ன நிகழ்வாக, வெள்ளி கோள் இ டைநகர்தல் பார்க்கப்படுகிறது.
தலைமுறை தாண்டிய அபூர்வ நிகழ்வை, அனைத்து தரப்பு மக்களும் பார்க்க வேண்டும் என்ற விழிப்புணர்வை ஏற்படுத்த, தமிழ்நாடு விழிப்புணர்வு இயக்கம் நேற்று முன்தினமும், நேற்றும் மாநில அளவிலான பயிற்சி பட்டறையை புதுக்கோட்டையில் நடத்தியது.
இதில், 50க்கும் மேற்பட்ட பயிற்றுனர்கள் பங்கேற்றனர். அந்த பயிற்சி பட்டறை நிறைவு விழா நேற்று நடந்தது. இதில் பங்கேற்ற கல்பாக்கம் அணுமின் நிலைய விஞ்ஞானி பார்த்தசாரதி, தேசிய அறிவியல் தொழில்நுட்ப பிரச்சார குழு உறுப்பினர் ராமலிங்கம், அறிவியல் பிரச்சார மாநில ஒருங்கிணைப்பாளர் பாலகிருஷ்ணன் ஆகியோர் நிருபர்களிடம் கூறியதாவது:
வரும் ஜூன் ஆறாம் தேதி காலை ஆறு மணி முதல் 10.40 மணி வரை இந்தியாவில் உள்ளவர்கள் வெள்ளிகோள் இடைநகர்தலை காணலாம். அதை வெறும் கண்ணில் பார்ப்பது ஆபத்தானது. விழித்திரை நிரந்தரமாக பாதிக்கும். சூரியனையே வெறும் கண்ணால் பார்க்கக்கூடாது.
டெலஸ்கோப் மூலம் சூரிய பிம்பத்தை தரையில் வீழ்த்தி வெள்ளி இடைநகர்தலை பார்க்கலாம். வெல்டிங் கிளாஸ் (எண் 14) மூலம் சிறிது நேரம் பார்க்கலாம். கண்ணாடி உதவியோடு அட்டையிலான நுண்துளை கேமரா மூலம் சூரிய பிம்பத்தை திரையில் வீழ்த்தி பார்க்கலாம்.
சிறிய கையடக்க கண்ணாடி மூலம் சூரிய பிம்பத்தை வட்டமாக தெரியுமாறு இருட்டறையில் வீழ்த்தி பார்க்கலாம். இவைதவிர வேறு எந்த வகையிலும் வெள்ளி இடைநகர்தலை பார்க்கக்கூடாது.
இந்த அபூர்வ நிகழ்வை பார்ப்பது தொடர்பான அறிவியலுக்கு புறம்பாக வெளியாகும் வதந்திகளை நம்பவேண்டாம். தமிழ்நாடு அறிவியல் இயக்கம் வெள்ளி இடைநகர்தல் அபூர்வநிகழ்வை பார்ப்பது குறித்து மாநிலம் முழுவதும் விழிப்புணர்வு பிரச்சாரம் செய்யவுள்ளது.
மாநிலம் முழுவதும் 150 முதல் 200 வரையிலான டெலஸ்கோப் அமைத்து பார்க்கும் வசதியும் ஏற்படுத்தப்படுகிறது. தற்போது பயிற்சி பெற்ற பயிற்றுனர்கள் ஒன்றிய அளவில் 1,500 பேருக்கு பயிற்சிமுகாம் நடத்தி, அவர்கள் மூலம் மாநிலம் முழுவதும் வெள்ளி இடைநகர்தலை பார்ப்பது தொடர்பாக விழிப்புணர்வு ஏற்படுத்தப்படும்.
இவ்வாறு அவர்கள் கூறினர்.

நன்றி: தினமலர்

ஏப்ரல் 2012 இரவுவான் April 2012 nightsky

கோள்களின் நிலைகள்

2012 ஏப்ரல் 10 முதல் மே 9 வரை

சே.பார்த்தசாரதி

சூரியன் உதிக்கும் முன் தெரியும் கோள்கள்:

புதன்:            இக்கோள் ஏப்ரல் இரண்டாம் வாரத்திலிருந்து இம்மாத இறுதிவரை காலைகிழக்கு அடிவானில் தெரிந்தபோதிலும், மூன்றாம் வாரத்தில் நன்கு காணலாம். இம்மாதம் முழுவதும் இக்கோள் மீனம் தொகுதியில் உள்ளது.
 ( குறிப்பு : காலை நேர விண்மீன் தொகுதிகளை அடையாளம் காண கடந்த ஆகஸ்ட் மாத துளிர் இரவு வான் வரைபடத்தை உபயோகிக்கலாம்)

சூரியன் மறைந்தபின் தெரியும் கோள்கள்:

செவ்வாய்:      இது இம்மாத இறுதியில் மாலையில் சூரியன் மறைந்தபின் கிழக்குவானில் உச்சிவானிற்கு அருகே தெரியும். இக்கோள் சிம்மம் தொகுதியில் உள்ளது.

வெள்ளி:        இக்கோள் மாலை மேற்கு வானில்  இம்மாதம் முழுவதும் நன்கு தெரியும். இது இக்காலம் முழுவதும் ரிஷபம் தொகுதியில் உள்ளது.

வியாழன்:        சூரியன் மறைந்தபின் மேற்கு அடிவானில்  தெரியும். இதற்கும் சூரியனுக்குமான பிரிவு தூரம் குறந்துகொண்டே வருவதால் இம்மாத மூன்றாம் வாரத்திற்குப்பின் இதைக் காண்பது கடினம். இக்கோள் மேஷம் தொகுதியில் உள்ளது.

சனி:              இக்கோளை, சூரியன் மறைந்து சிறிது நேரம்கழித்து, கிழக்கு அடிவானில் சித்திரை நட்சத்திரத்திற்கு அருகே காணலாம். இது கன்னி விண்மீன் தொகுதியில் உள்ளது

சில முக்கிய வான் நிகழ்வுகள்:

ஏப்ரல் 15:        சனிக்கோள் சூரியனுக்கு நேரெதிரே அமைதல் (opposition). அதாவது சூரியன் மறையவும் இது கிழக்கு வானில் உதிக்கும்.

ஏப்ரல் 18:        புதன்கோள் சூரியனிடமிருந்து அதிகபட்சமாக 27 டிகிரி பிரிந்து இருத்தல் (Western elongation) எனவே இன்று புதனை நீண்டநேரம் அதிகாலை கிழக்குவானில் காணலாம்.

ஏப்ரல் 21:        அமாவாசை

ஏப்ரல் 22:        லைரா விண்தூரள்கள் அதிகபட்சமாக மணிக்கு10 முதல் 20 வரை தெரியும் நாள். பூமி

 தாட்சர் வால் நட்சத்திரப்பாதையைக்கடக்கும் போது, அதன் உதிரிகள் பூமியின் வளிமண்டலத்தில் நுழைவதால், அவை எரிமீன்களாக வானில் லைரா விண்மீன் தொகுதியிலிருந்து வருவதுபோன்று தோன்றுகின்றன. இந்நாளில் நிலவின் வெளிச்சம் இல்லாததால் இவ்வருடம் அதிகாலை 3 மணி பிறகு இதை நன்கு காணலாம்.

மே 5-6:           ஈட்டா கும்பம் விண்தூரல்கள் அதிகபட்சமாக மணிக்கு சுமார் 60 வரை அதிகாலை கிழக்குவானில் தெரியும் நாள். ஹாலி வால்மீனின் பாதையை பூமி கடக்கும் போது கும்பம் தொகுதியிலிருந்து விண்கற்கள் விழக்காணலாம். முழுநிலவின் பிரகாசம் காரணமாக இவ்வருடம் இந்நிகழ்வை நன்கு காண இயலாது.

மே 6:               முழுநிலவு

சர்வதேச விண்வெளிநிலையம் தமிழகத்தில் நன்கு தெரியும் சில நாட்கள்:

மே 4 :             பிரகாசமான நட்சத்திரம் போன்று தெரியும் இது வடமேற்கு திசையில் சுமார் 6.56க்குதெரியத்தொடங்கி தென்கிழக்கு நோக்கிச்செல்கையில் சரியாக 07.01.52 மணிக்கு பூமியின் நிழலில் மறைந்து விடும். தமிழ்நாட்டில் மேற்கு அடிவானிலிருந்து அதன் அதிகபட்ச உயரயமாக 20 முதல் 45டிகிரி வரை  இதைக் காணலாம். 

மாவட்ட அளவிலான தேசிய குழந்தைகள் அறிவியல் மாநாடு

நன்றி : தினகரன்

காஞ்சி மாவட்ட 19வது தேசிய குழந்தைகள் அறிவியல் மாநாடு அழைப்பிதழ்

65வது சுதந்திர தினம் துளிர் மாணவர்கள் கொண்டாடினர்

தமிழ்நாடுஅறிவியல் இயக்கம் காஞ்சி கிளையினால் நடத்தப்பட்டுவரும் துளிர் இரவுபள்ளி மற்றும் துளிர் இல்லங்கள் சார்பாக மாணவர்கள் 65வது சுதந்திர தினத்தைக் கொண்டாடினர்.

இரவு வான் நோக்குதல் ஆகஸ்ட் 2011

கோள்களின் நிலைகள்

ஆகஸ்ட் 10 முதல் செப்டம்பர் 9 வரை

சூரியன் உதிக்கும் முன் தெரியும் கோள்கள்:

புதன்: இம்மாத ஆரம்பத்தில் மாலை நேரக் கோளாக இருக்கும் புதன், மூன்றாம் வாரத்தில் Aகாலை நேர கோளாக மாறுகின்றது. செப்டம்பர் மாத முதல் வாரத்தில் ஓரளவு இக்கோளைக் காண இயலும். இக்கோள் சிம்மம் விண்மீன் தொகுதியில் உள்ளது.

செவ்வாய்: காலை சுமார் 2 மணிக்கு இக்கோள் உதயமாகிறாது. அதிகாலை கிழக்கு வானில் நன்கு தெரியும். இக்கோள் மிதுனம் தொகுதியில் உள்ளது.

வியாழன்: இம்மாதம் காலைவானில் பிரகாசமான இருப்பது இதுவே ஆகும். இதைக் காலை மேற்கு வானில் நன்கு காணலாம். இது மேஷம் தொகுதியில் உள்ளது.

( குறிப்பு : காலை நேர விண்மீன் தொகுதிகளை அடையாளம் காண கடந்த ஜனவரி மாத துளிர் இரவு வான் வரைபடத்தை உபயோகிக்கலாம்)

சூரியன் மறைந்தபின் தெரியும் கோள்கள்:

வெள்ளி: இம்மாத அதிகாலை விடியும் நேரத்தில் கிழக்கு அடிவானில் உள்ளது. பின்னர் இம்மாத மூன்றாம் வாரத்திலிருந்து மாலை நேர கோளாக மாறுகின்றது. இக்காலம் முழுவதும் சூரியனுக்கு மிகமிக அருகில் உள்ளதால் இதைக்காண இயலாது இக்கோள் கடகம் விண்மீன்தொகுதியிலிருந்து சிம்மம் தொகுதிக்குச் செல்கிறது

சனி: சனிக்கோளை சூரியன் மறையவும் மேற்கு அடிவானிலிருந்து சுமார் 30 டிகிரி உயரத்தில் தெரியத் தொடங்கும். இம்மாதம் முழுவதும் கன்னி விண்மீன் தொகுதியில் சித்திரை நட்சத்திரத்திற்கு சற்று மேற்கில் காணலாம்.

சில முக்கிய வான் நிகழ்வுகள்:

ஆகஸ்ட் 13: முழுநிலவு

ஆகஸ்ட் 16: வெள்ளிக் கோள் சூரியனுக்கு நேர் பின்புறமாக அமைதல் (superior conjunction)

ஆகஸ்ட் 17: புதன் பூமிக்கும் சூரியனுக்கும் இடையில் அமைதல்.

ஆகஸ்ட் 18: நிலவு சேய்மைத் தொலைவில் இருத்தல் ( apogee).

ஆகஸ்ட் 23: நெப்டியூன் சூரியனுக்கு நேர் எதிரே அமைவதால் சூரியன் மறையவும் கிழக்கே உதிக்கும். தொலை நோக்கி வழியாக இக்கோளை காணலாம்.

ஆகஸ்ட் 25: செவ்வாய் அதிகாலை கிழக்குவானில் பிறைநிலவுக்கு சுமார் 5 டிகிரி கிழக்கே இருத்தல்

ஆகஸ்ட் 29: அமாவாசை.

ஆகஸ்ட் 30: நிலவு பூமிக்கு அண்மைத் தொலைவில் உள்ளது (perigee)

செப்டம்பர் 3: புதன் சூரியனிலிருந்து அதிகபட்சமாக 18 டிகிரி மேற்காக பிரிந்து இருத்தல். அதிகாலை கிழக்குவானில் புதனை சுமார் 5.15 – 5.45 மணிக்குள் ஓரளவு காண இயலும் நாள்.

சர்வதேச விண்வெளி நிலையம் (ISS) தமிழகத்தில் நன்கு தெரியும் சில நாட்கள்:

ஆகஸ்ட் 12: பிரகாசமான நட்சத்திரம் போன்று தெரியும் இது தென்மேற்கு திசையில் மாலை சுமார் 7.04க்குத் தெரியத்தொடங்கி வடகிழக்கு நோக்கி சுமார் 7.11 வரை செல்லக் காணலாம். அடிவானிலிருந்து அதன் அதிகபட்ச உயரயமானது தென் மாவட்டங்களில் சுமார் 76டிகிரியாகவும் வட மாவட்டங்களில் சுமார் 67 டிகிரியாகவும் இருக்கும்.